कविता

कविता( कमरेड युद्ध अझै जारी छ )

उही केसमा एउटा दोषी

अर्कोलाई छुट छ 

सक्नेले नै लुट्छ यहाँ

उसैलाई ब्रम्हलुट छ

जसको हातमा ठेला छैन

उसकै घरमा भकारी छ 

त्यसैले त कमरेड युद्ध अझै जारी छ ।

बन्दुकले नढलेका कमरेड

नैतिकताले ढल्न थाले

संघीयताको खोल ओढी

सयौ श्रीपेच चल्न थाले

शोषण दमन उत्पीडनलाई

अझै पनि छहारी छ

त्यसैले त कमरेड युद्ध अझै जारी छ ।

स्वरोजगारको नाराभित्र

बेरोजगारको लाम छ

भ्रष्टाचार र घुसखोरी

अझै खुलेआम छ

दुखियाको थाप्लो माथि

झनै ऋणको भारी छ 

त्यसैले त कमरेड युद्ध अझै  जारी छ ।

दलाल र माफियाले

शिक्षा ध्वस्त पारिसके 

जनवादी शिक्षा भन्थ्यौ

धनबाद मा सारिसके

आफ्ना सन्तान निजीतिर

गरीबलाई सरकारी छ 

त्यसैले त कमरेड युद्ध अझै जारी छ ।

आफै भित्रको सामन्तबाद

ढल्न अझै बाँकी छ

जनताको शासन त

चल्न अझै बाँकी छ 

जसलाई विश्वास गर्यो

उही  लाचारी छ ।

त्यसैले त कमरेड युद्ध अझै  जारी छ ।

जसका बिरुद्द युद्द लड्यौ

आज उही साथी छ 

मोर्चामा आफू भन्दा

अझै उही माथि छ 

केही नेता धनाढ्य भयौ

जनता भिखारी छ

त्यसैले त कमरेड युद्ध अझै जारी छ ।

कर्णालीले टाउको दुख्दा

सिटामोल पाको छैन

झुपडीमा अझै पनि

गणतन्त्र आको छैन

सर्वहारा कमरेडको 

दरबारमै घरबारी छ

त्यसैले त कमरेड युद्ध अझै जारी छ ।

कहिले रुन्छ कालापानी

कहिले रुन्छ सुस्ता

अझै कति रोई बस्ने

भविष्यको पुस्ता

हट्ने होइन डटी लड्ने

नेपालीको चिनारी छ 

त्यसैले त कमरेड युद्ध अझै जारी छ ।

रोग भोक गरीबीले

छट्पटी हटेको छैन

भ्रष्टाचारको जालो पनि

पटक्कै डाँडो कटेको छैन

समृद्धि वारी होइन

अझै क्षितिज पारी छ

त्यसैले त कमरेड युद्ध अझै जारी छ ।

अरु सँग होइन अब

आफैसँग लड्न सिक

एक्लै होइन समृद्धि पथमा

सँगै अघि बढ्न सिक 

अन्याय र अत्याचारको

विरुद्ध खबरदारी छ

त्यसैले त कमरेड युद्ध अझै जारी छ ।

२०७६/११/०१

सन्दर्भ : जनयुद्द दिवस