चितवन मेडिकल कलेजमा समस्या विरामी मर्कामा

रत्ननगर (चितवन),  जेठ २७ गते । चितवन मेडिकल कलेज भरतपुरमा पाँच दिनदेखि उपचार गराइरहेकी सुत्केरी भवानी घिमिरेको अस्पतालको लापरबाहीका कारण मुत्यृ भएको भन्दै पीडितहरुले अस्पताल घेराउ गरेका छन् । अस्पतालसमेत तोडफोड गरेर अशान्ति मच्चाएको भन्दै अस्पतालले पनि ओपिडी सेवा बन्द गरेर आन्दोलन थालेको छ । पीडितपक्षले चिकित्सकको लापरबाहीले सुत्केरीको ज्यान गएको आरोपमा अस्पतालमा तोडफोड गरेका थिए ।

    अस्पतालमा विवाद चर्किएर तोडफोड हुन थालेपछि प्रहरी परिचालन गरिएको छ । पीडितहरुले उचित क्षतिपूर्ति र पीडकलाई कारबाहीको माग गरेका छन् । यस विषयमा आइतबार भएको वार्ता निष्कर्षविहीन भएपछि आज पुनः वार्ता गर्ने भनिएको थियो तर बैठक बस्न सकेको छैन । अस्पतालको सुरक्षाको माग गर्दै अस्पतालका चिकित्सक तथा अन्य स्वास्थ्य सङ्घसंस्थाहरु पनि आन्दोलित भएका छन् । रासस